«آذربایجان سیاسی محبوسلارینین محکمه‌سی آچیق گئچیریلسین» امضا پتنشنی
شوعارلارین‌دان بیری «آزادلیق» اولان ۱۹۷۹-جو ایل اینقیلابیندان ۴۵ ایل گئچسه ده، اینقیلاب محکمه‌لری هله ده قورولور. یئنه ده هر ایل چوخلو ساییدا سیاسی و اجتماعی فعال حبس ائدیلیر، موحاکیمه اولونور و ظاهره‌ن تهلوکه‌سیزلیک اتهامی ایله حبس ائدیلیر، بعضیلری حتی داها آغیر اتهاملارلا اعدام ائدیلیر.
ایران‌ین محکمه سیستئمی، اوزده، عموم خالق طرفیندن بو اینسانلارا قارشی اتهاملار ایرهلی سورور و اونلاری آچیق اولمایان، غئیری-شفاف و اوستواؤرتولو بیر شکیلده حبس و دیگر جزالارا محکوم ائدیر.
اینسان حاقلاری شوراسی کیمی اولوسلارآراسی اینسان حاقلاری تشکیلاتلاری، آمنستی اینترنشنال و اینسان حاقلاری ایزلمه تشکیلاتی (Human Rights Watch) کیمی غئیری-حکومت حقوق مدافعه تشکیلاتلاری موختلیف وسیله‌لرله ایراندا سیاسی محبوسلارین آزادلیغا بوراخیلماسینا چاغیریبلار. بونونلا بئله، ایران حکومتی ایران حبسخانالاریندا سیاسی محبوسلارین اولماسینی اینکار ائدیر و بو تشکیلاتلارین آدلاری چکیله‌ن شخصلرین سیاسی محبوس دئییل، گؤونلیک جینایتکارلاری اولدوغونو، اؤلکه و خالقا قارشی آددیملار آتدیقلارینی ادعا ائدیر.
بونون عینیسینی پهلوی رژیمی ده او دؤورده ائدیردی و حاظیرکی رژیمین رهبرلری و او دؤورون دیگر سیاسی محبوسلارینی سیاسی محبوس یوخ، گؤونلیک جینایتکاری و تخریباتچی ساییردی.
ایسلام جمهوریتی‌نین سیاسی محبوسلارین مؤوجودلوغونون اینکار ائتمه‌سی سیاستینه باخمایاراق، بو محبوسلارین فعالیتی، بیاناتلاری و یازیلاری اونلارین عموم خالقین ماراقلاری و دوشونجه‌لرینین حاکم سیستئمله ضد اولدوغو اوچون حبس ائدیلدیگینی آیدین شکیلده گؤستریر.
اؤتن آیلاردا و ایللرده بیر چوخ آذربایجان‌لی تورک فعالی، ساختا گؤونلیک اتهاملاری و اونلارا قارشی قالدیریلان موختلیف اساسسیز داعوالارلا نظارته آلیناراق، حبسه آتیلیب و اونلارین بیر چوخو آیلاردیر غئیری-معین وضعیتده ساخلانیلیر.
ایراندا مظلوم میللتلرین و دونیا قامواویونون نظرینه چاتیدیریق کی؛
بیز بو پتنشنی ایمضالایانلار ایکی اساس سببه گؤره بو محبوسلارین و سیاسی فعاللارین گیزلی محکمه سوره‌جینه قارشیییق و طلب ائدیریک کی، اونلارین آچیق محکمه‌سی جانلی اولاراق تلویزیون کامئرالاری قارشیسیندا و حقیقی منصفه هئیتی، وکیللرین، حقوق مدافعه تشکیلاتلارینین نماینده‌لرینین، مئدیا منسوبلارینین ایشتیراکی ایله گئچیریلسین.
بیرینجیسی، توتوقلانان و محبوس اولان سیاسی فعاللار میللت آدینا و میللتین حقوقلارینی مدافعه ائتمک و اجتماعی ممنافعینی مدافعه ائتمک مقصدی ایله چالیشیرلار، دیگر طرفدن، حاکمیت میللتین نماینده‌سی اولدوغونو ادعا ائدرک، بو اینسانلاری عموم خالقین ماراقلارینی قوروماق اوچون بو اینسانلاری آزادلیقدان محروم ائتمک و حیاتلارینی محو ائتمک حاقینا مالیک اولدوغونو ایرهلی سورور.
بئله‌لیکله، هانکی طرفین حقیقته‌ن ده عموم حالقین منافعینه چالیشدیغی آیدینلاشدیریلمالی، محکمه پروسه‌سی و ایچه‌ریگی ایله باغلی افکار عمومی بیلگیلندیریلمه‌لی، سون حاکم (قاضی) ایسه خالق اولمالیدیر.
ایکینجی‌سی، دونیادا قبول ائدیلمیش حقوقی ایستانداردلارا، او جمله‌دن دونیالیق اینسان حاقلاری بیلدیریسی‌نین۱۰-جو مادده‌سینه، مدنی و سیاسی حاقلار اولوسلارآراسی سؤزلشمه‌سی ۱۴-جو مادده‌سینه و اولوسلارآراسی جزا محکمه‌سی نیظامنامه‌سینین ۶۸-جی مادده‌سینه اساسن، هر کسین دوسیاسینا موستقیل و غرضسیز محکمه‌ده عدالتلی و آچیق شکیلده باخیلماسی حقوقونا مالیکدیر.
حتی ایران ایسلام جمهوریتی‌نین آنایاساسی‌ندا ۱۶۵-جی مادده‌یه اساسن محکمه سوره‌جی آچیق گئچیریلمه‌لیدیر و آنایاسانین ۱۶۸-جی مادده‌سینده گؤستریلیر کی، سیاسی و مطبوعات سوجلارینین تحقیقاتی آچیق شکیلده و منصفه هئیتینین (ژوری) قاتیلیمی ایله آپاریلمالیدیر.
همچینین، سیاسی سوچ قانونونون ۴-جو مادده‌سینده سیاسی سوچلارا باخیلما قایداسی و ژوری هئیتی ایله باغلی قایدالار ۲۰۱۳-جو ایلده تصدیق ائدیلمیش جزا موحاکیمه قانونونا (آیین دادرسی کیفری) اویغوندور. جزا موحاکیمه قانونونون ۳۵۲-جی مادده‌سینده ده محکمه‌لرین آچیق گئچیریلمه‌سی تثبیت اولونوب.
بئله‌لیکله، ایران ایسلام جمهوریتی رژیمی حبس ائدیلمیش اجتماعی و سیاسی فعاللاری آچیق شکیلده موحاکیمه ائتمه‌دیکجه، اونلار اوچون هر جور جزانین وئریلمه‌سی بو اینسانلارا قارشی حاقسیزلیق اولماقلا یاناشی، قامواویونو (افکار عمومی) آلداتماق حساب ائدیلیر و هئچ بیر مشروعیتی یوخدور.
نه سیاسی سوچلا باغلی وئریلمیش پیس نیتلی تعریف، نه ده اساسسیز گؤونلیک اتهاملاری آچیق و عدالتلی محکمه آراشدیرماسی حقوقونو پوزابیلمز. آذربایجان میللی حرکتی‌نین مدنی و سیاسی فعاللارینا، هابئله مظلوم میللتلرین و ایران‌ین موختلیف بؤلگه‌لرینین سیاسی محبوسلارینین اکثریتینه قارشی ایرهلی سوروله‌ن اتهاملار اساسسیزدیر و حقوقی اولاراق اونلارین فعالیتی ایله هئچ بیر ایلگیسی یوخدور.
بیز اینانیریق کی، آزادلیق اونلارین حاققیدیر و خئییر و عموم خالقین خئیرینه قارشی بو مسئول اینسانلارین قیدسیز-شرطسیز آزادلیغینی طلب ائدیریک.
مادام کی، ایران ایسلام جمهوریتی رژیمی و خصوصن ده محکمه سیستئمی بو شخصلرین جینایت تؤره‌تدیگینه اینانیرسا، قامواویو قارشیسیندا موحاکیمه ائتمه‌لیدیر کی، خالق دا اؤز حؤکمونو وئرسین.
شوبهه‌سیز کی، محکمه‌نین آچیق گئچیریلمه‌سی و موستقیل ژوری هئیتینین محکمه‌لرده حاضر اولماسی محکمه‌نین عدالتلی گئچیریلمه‌سینه دوغرو بیر آددیم اولاجاق. باشقا سؤزله، وطنداشلار محکمه ایجلاسلاریندا ایشتیراک ائتمکله پروسئسلرین گئدیشینه، قانونلارا رعایت اولونماسینا، حاکملرین غرضسیزلیینه نظارت ائدیرلر و بئله‌لیکله، خالقین موحاکیمه قورخوسو سببیندن قانونا ضد ائیلملر اوچون قانوندان سوء-ایستیفاده ائتمه احتیمالی دا آزالیر.
سون اولاراق بونو قئید ائتمکده فایدا وار، باخمایاراق کی، بو پتنشن و کامپانیادا «آذربایجان سیاسی محبوسلارینا آچیق محکمه» طلب اولون‌سا دا، بیز حساب ائدیریک کی، هر دوشونجه‌یه مالیک اولان هر فردین عدالتلی و آچیق محکمه حقوقو اولدوغونا اینانیریق و بیز ایراندا بوتون سیاسی متهملر اوچون آچیق محکمه گئچیریلمه‌سینی طلب ائدیریک.
