علییئو و پاشینیان مسکووادا گؤروشدو
روسیا دؤولت باشقانی ولادیمیر پوتین، آذربایجان جمهورباشقانی ایلهام علییئو و ارمنیستان باشباخانی نیکول پاشینیان، آذربایجان-ارمنیستان اختیلافینی گؤروشمک اوزره روسیانین باشکندی موسکوادا بیر آرایا گلدی.
پوتین، کرملین ساراییندا اؤنجه علییئو و پاشینیان ایله آیری-آیری ایکی‌لی گؤروشمه‌لر گئرچکلشدیردی.
بو ییغینجاقلارین آردین‌دان اوچ لیدئرین بیر آرایا گلدیگی ییغینجاغین باشیندا پوتین دانیشدی.
پوتین، ییغینجاق دعوتینه اجابت ائدیلدیگی اوچون مینتدار اولدوغونو ایفاده ائد‌رک “بونون اوزون مدت‌دیر دانیشدیغیمیز بعضی قونولارین عملده حلی اوچون یاخشی بیر مقدمه اولماسینی اومود ائدیره‌م” دئدی.
بو فورمت‌ده ائدیله‌ن ییغینجاق‌دا بیر چوخ قازانیملار الده ائتدیکلرینه دقت چکه‌ن پوتین، ۲۰۲۰ده چاتیشمالارین سونا چاتدیغینی، اقتصادی و نقلیات باغلانتیلارینین آچیلماسی، سرحدلرین تعیین اولونماسی ایله باغلی ایشلرین باشلادیغینی خاطیرلاتدی.
پوتین، “بعضی چتینلیک و پروبلئملره باخمایاراق عمومیتله وضعیت حله دوغرو گئدیر. بونلاردان بیری نقلیات باغلانتیلارینا دایر ایشلر هله حل ائدیله‌بیلمه‌یه‌ن پروبلئملر وار، آنجاق منجه بونلار یالنیز تکنیک اؤزاللیک داشیییر” دئیه دانیشدی.
روسیا، آذربایجان و ارمنیستان باشباخان کؤمکچیلرینین بیر هفته سونرا بو قونولاری گؤروشمک و حل ائتمک اوزره بیر آرایا گلمه‌سینی تکلیف ائد‌ن پوتین، بو ییغینجاغین گله‌جک هفته ائدیلمه‌سی باره‌سین‌ده علییئو و پاشینیانین دا اونایینی آلدی.
پوتین، “بو، هله حل ائدیلمه‌میش پروبلئملرین حل ائدیله‌جگینه دایر اومود وئره‌ن یاخشی بیر آنلاشما” دگرلندیرمه‌سی وئردی.
اوچلو ییغینجاق ۲۰ دقیقه داوام ائتدی.
