آنا دیلی گؤنؤ، قاشقایی تورکوسو گؤنؤ
اسفند آیینینگ ایککیمکی گؤنؤ(فوریه ۲۱)یونسکو طرفیندن دونیا آنادیلی گؤنؤ(International Mother Language Day) آدلاندیریلمیشدیر و ۱۹۹۹ ایلیندن بری نچه دیلیلیک(multilingualism ) و نچه فرهنگیلیگی(multiculturalism ) تقویت وتشویق ادمک ایچین بو گؤنؤ رسمی تقویمینده جشن توتییر. آردیجا ۲۰۰۸ ایلینی ده دونیا دیللری گؤنؤ آدلاندیرمیشدیر.
دیل سو تکین دیر و بیز بالیغ لار تکین بو دنگیز ایچینده یئزییرک. دیل سیز بیر دونیا اولماز نیچی کی بیزیم اطرافیمیزداکی بو دونیا ایچینده دیریلیک ادیرک.
وارو میلت لرینگ کیملیگی و فرهنگی دیل لری ایچینده باشییر. آیری بیر دئیشینن اونانچاز کی بیز اؤز دیلیمیزی ساخلادیب ایشلدیرگ، دیریگ. قاشقایی تورکچه سی اولمازسا نه قاشقایی فرهنگی قالار، نه ده قاشقاییلیک.
بیزیم گؤرؤنمین اوبامیز و یوردوموز دیلیمیزدیر؛ سونگ سنگریمیزدیر.
دیل فقط بیر ارتباط وسیله سی دیل، بیزیم دونیایا وردیگیمیز و آلدیگیمیز آنگلامدیر. دونیایی دیلنن آنگلایا بیلدک و آنگلاملاندیرا بیلدک.
قاشقایی دیلی وارو ظولملر و تبیعضلره قارشی دایانمیش آما گرچک بو که چوخ یورولموش و گئجسیزلشمیشدیر، قاشقایی میلتی تکین. نیچی کی بیر میلتینگ آیناسی دیلیدیر. سونگ ۱۰۰ ایلده بیزیم آنادیلمیز آیری دیلردن چوخ تاثیر آلمیش و تؤرمه و ئورمه یوللاری باغلانمیش آما بو یولو آچماگ بوتون قاشقایی خلخینینگ وظیفه سیدیر.
بو یولدا ال ال اؤستونه قویماک و تقولونگ ادمگ یرینه بیر نچه ایش گؤره بیلدگ. دیلیمیزده دانوشماک و یازیشماک باشداکی آددیمدیر. سورا دا باشدا آیدین لار دیلی گنه دن گؤج لندیرمیه باش قویاسی و سورا دا خلخیمیز اونو قوروماک دا چوخ چابالایاسیدیر. اوبالاری تورکی اؤرگنمک مدرسه لرینه دؤندرسیگ. آنالاری و آتالاری بیلینچلندیرملیک و بونو گؤرسدملیگ که اوشاغلارینگ گلجک لری ایچین هر نه چوخ راگ و ئیی رگ بیللر دیلی، ئیی رگ اولار.
آچیق آیدین دیر کی نچه دیلیلیک، نچه دونیالیلیکدیر! هر نه بیلدیگیمز دیل لرینگ نچه لیگی(کمیت) و نیجه لیگی(کیفیت) آرتیق اولا، دونیامیزی و اؤزؤمؤزی ییتر تانییاراک و یئیتر ارتباطلاریمیز اولار. بوندان آیری دا دیه بیلدم کی ینگی دیلی ئیی اؤرگننلر آنا دیللرینی ئیی بیلنلردیر.
آردیجا تورکی اؤرگنمک دونیاداکی آیری تورکلارینان یخینلشمک و راحت ایلیشگی قورماک یولودور. چین دن(سالار و اویغور تورکلری) توتینگ تا مولداوی یانچار(گاگاووز تورکلری)، سیبری دن(تاتارلار) توتینگ تا قاشقایی یوردونانچاز چوخ میلتینگ و اؤلکه نینگ دیلی تورکیک دیر و چوخ قاپونینگ کلیدی تورکی دیلدیر.
اینترنت، تلوزیون و بؤتؤن مدیا دا تورکی دیله ارتباط قورماک، مخصوصا بیزه چوخ یخین اولان آذربایجان و تورکیه تورکچه سی و کاناللارینا باخماک چوخ بویوک نقش اوینار.
آنادیلیمیز گؤنؤ، قاشقایی تورکچه سی گؤنؤ، وارو قاشقایی میلتینه موبارک اولسون. هوممارام بو دیلیمیزی و کیملیگیمیزی قوروماک و ساخلادماک ایچین بیر باشلاما آدیمی اولار.
